|
|
 |
|
|
Ontwerp
: Hans v/d Riet
Beste
meziek vrinde.
20
jaor geleeje, waat vluug d’n tiëd.
Bijna
20 jaor geleeje kwaam ik as kersverse melkboer beej joekskepèl Me Dunk,
die toen dreej maond ald waas.
Ein kepèl van bijna
allemaol melkboere. (de ièrste melkboerekepèl)De joekskepèl is gebaore op ‘t
werk beej de S.R.V. in Someren.Ein paar minse van kantoèr en ein paar melkboere
woele waal ens same waat oprichte. Ze kóste allemaol gen noeët laeze, laot
staon ein instrument vashalde. Maar nao ein paar maond theorie op eine zölder
beej Frans v.d. Rijdt en ónder kundige
leiding van Piet Khonissen kwaam d’r intelik schot in.Links en rechs woorte ein paar instrumente gekoch en d’r kwaam ouk nog geluùd oèt. En
nao twintig jaor zit d’r nog altièd geluùd in.In dees twintig jaor hebbe
mièrdere minse as lid de revue gepasseerd, waat ouk hièl normaal is.Allein Jeu
is d’r nog vanaaf de oprichting (en speult nog altièd de ièrste trompet). In
dees jaore is d’r vuuël veranderd. Ièrs woele weej d’r gen
vrouwluuj
beej. Op dit moment zien d’r al 6 beej ós klupke. Ouk woele weej ièrs neet in
ein kefee rippetere, maar ós thoèshave is noow kefee APOLLO wao weej ós
hielemaol op ós gemaak veule. Ouk ózze mezièk is veranderd en geit met zienen
tièd mei. Ónder kundige leiding van Piet Khonnissen, Paul Bloemers, Wiel Gatzen
en Gé Detillon zien weej nog altièd “good” gebleve, waoveur ózzen dank aan dees minse.As veurzitter mósse de ker trekke,
euver berg en door dale. Maar zoeëlang
de ker rolt meuge weej neet klage.
Mien
motto is:
MEZIÈK, LOL en PLEZEER en op ziènen tièd
einglaeske BEER.
Want
as ein van dees ingrediënte d’r neet is dan vergaet ut maar. Dus ME DUNK op nao de 25 jaor.
Ben Faessen,Veurzitter.
Meug ik mich efkes
veurstelle ?
Miene naam is Gé
Detillon en ik laup al 42 jaor op deezen aerdbol rônd Mien ièrste muzikale
stappe heb ik genaome beej hermenie Caecilia in Blièrick. Daonao bin ik nao
Venlo gegaon beej de keuninklikke en heb mien lesse gehad beej Harie Bougenon op de Golziusstraot. Wiejer in
de mezièk bin ik in deens gekómme en ik heb ouk mièr as twelf jaor beej einen
Tegelse Bigband gespeuld. Me Dunk kin ik van vruùger as de
joekskepèl van de melkboere en ik heb in ‘t
verleeje ouk al emus van Me Dunk les gegaeve op de schuuf.
Wie John Nelissen mich vroog of ik zin had um beej Me Dunk ‘t
muzikale veurtouw te neme, heb ik jao gezag umdet ik op det
moment al einen tièd niks umhand gehad had, en
mien ervaringe met Me Dunk oèt1995 positief zien
gebleve en ik gaer ens weer same mezièk woèl make met minse
die mezièk neet as broeëdwinning zeen maar ouk
de lol d’r van inzeen. Noow besteit Me Dunk 20
joar en det is veur zó’n gezelschap einen hiélen tièd, maar
volges mich kump det door de gooje ónderlingen band dae
dit klupke op de bein hilt. Ik haop in idder geval det
ik nog einen tièd van dit illustere
gezelschap deil oèt kin make
en wins Me Dunk en al euren aanhang ouk veur de kómmende jaore vuuël plezeer en
gelök.
Beste
mezièkvrinde,
Ik
heit Bep Boots en speul op de alt-sax.
Óngevièr dreej jaor geleeje woort mich
gevraog of ik beej Me Dunk
woel
kòmme. Det leek mich waal wat.Veural
umdet ik dinsdaags nog niks te doon had. Op
maondaag speul ik beej de Klaroen, op dinsdaag beej Me Dunk en op woensdaag
beej de Joeksjagers. Zoeë zeet geej det mezièk veur mich de gezelligste
óntspanning is die
ik
mich bedinke kan.
Hallo,
Ik heit Peter Francken, ik bin nao
vuuël oètnuuëdiginge beej
Me
Dunk terechgekómme. Nao
waat aarzele bin ik toch begónne met trómpet speule. Dit
bevelt mich tot d’n daag van vandaag prima.
Miene naam is Carla van de Riet en ik
bin vanaaf jannewarie 1999 beej Me
Dunk. Ik heb vanaaf mien tieënde tot mien achtieënde laevesjaor beej d’n drumband van de hermenie van Blierick
getrómp. In 1977 zien weej met de hermenie in Valencia op kónkoer gewaes en
hebbe dao d’n ièrste priès gehaold. Det
waas eine geweldigen tièd. Maar aan alles kump ein ind, dus ouk aan ‘t meziek
make.
Tot
det Hans beej Me Dunk ging blaoze, toen ging ‘t toch weer kriebele. De
deksels ware euver dus………………….. Me Dunk is ein hartstikke leuke joekskepèl, en
ik haop det weej nog hièl lang vuuël mezièk, lol en plezeer meuge bliève make.
Miene naam is Hennie
Juressen.
Ik bin lid
vanaaf 1994. In ‘t begin
dach ik wat mót ik heej tösse allemaol die
manne. Maar ik woort d’r good ontvange. Ein
jaor later kwame der mièr vrouwe beej de
klup. Den ièrste
fietstoch waas leuk, vuuël mezièk make en vuuël
beer hadde ze meigenaome. Want die
speeje der ouk neet in….. Maar ‘t
leukste is vuuël meziek make, ein pilske drinke
en vuuël lol en plezeer make.
Hallo,
Ik
bin Jopie Huberts, werk beej Tante Bet, en blaos noow anderhalf jaor
Mien partie met vuuël plezeer beej ‘t zwaor Same met mien maatjes Ben, Dré,
Sjaak, Hans en Sjaak En neet te vergaete John, want dae haet met zien schuuf
smeis ein solo taak Achterin ‘t slaagwerk en me wet wie det geit Die make op
d’n tièd ‘t nuuëdige leweit Veurin de saxe en trómpette Die d’r mei duchtig op
los retteketette Ouk ik bin ach jaor geleeje begós met ein trómpet Maar det
móndstök waas veur mich naatje pet Dan maar waat groeëters, ein bariton, en det
waas ‘t veur mich Ein instrument wao ik op kin träöte, det pas ouk baeter beej
mien gezich Door mien zuske Marjan Bin ik beej Me Dunk beland Idderen
dinsdaagaovend gaon ik weer gaer Nao APOLLO, ós rippetitielokaal haer Ik haop
det det nog lang door meug gaon Det wilt dan ouk zegge det Me Dunk nog
jaore blief bestaon
Ik
bin Marjan de Winden,
Ik
bin 46 jaor, óngevièr ein jaor lid en speul kornet. Ik zóch ein joekskepèl die
op vastelaoveszóndaag mezièk mak.
Door rónd te vraoge bin ik via via beej Me
Dunk tereggekómme. Zeej zóchte nog minse um in d’n optoch mei te trekke, ‘t waas waal in Duitsland maar
det vónd ik neet erg. Det beveel mich zoeë good det ik beej dees joeksige kepèl
bin gebleve.
Hallo, ik bin Jo Spee en houw de diekste tróm
van de ganse kepèl. In 1997 met vastelaovend zien weej (det is mien vruike, de kinder en ik)
door Ben en Marlies oëtgenuuëdig um ens mei te gaon met Me Dunk. Nao d’n
optoch in Kaldekerke op zóndaag kwaam op maondaag in d’n Bookend de Boerebroèlof, dees waas hielemaol
te gek. Alles en idderein deej mei op de mezièk van Me Dunk. Ein aantal van de
vrouwluuj van Me Dunk vónde det ik maar mei meus daon. Ik zag: ik kièk waal, messchiens. Nao
de vastelaovend belde Ben mich op en zag: Jao, heej met mich, ik heb nog ein
vacature vreej as dich dao zin in haes, Hai de Bock stop d’r mei. Ik zag toen
teage Ben: jao messchiens, efkes euver dinke en
bepraote met mien vrouw. Die zag
gelièk det mós dich doon, det is
leuk en good veur dich. Ein waek later belde ik Ben
op en zag: Oké, alles is good schrièf mich maar in. Nao de jaorvergadering belde Ben truuk en zag: dich
kins beginne.En noow twieë jaor later vorm ik same met Carla en Leo ‘t
slaagwerk van de kepèl, en det met hièl vuuël plezeer.
Heej Venraoy, Heej Leo Wethly
Me Dunk beteikent veur mich: Same met andere jônges
en maedjes op ein gezellige meniër meziek make. As joekskepel wilse de minse
oeteindelik stumming en plezeer bringe, zoëdet
idderein d’n dagelikse sleur met zörreg efkes kan vergaete. Plezeer önderein wuurd namelik nóg plezeriger asse
zuus det andere minse eur plezeer aan ôs plezeer belaeve !!
Hallo,
ik heit Daniel Fermont
Ik hoort det Me Dunk weer door ‘t dörp leep, verkleid as zwarte piet. Det waas in 1997. Ik heb toen gevraog of ik mei meugde doan en det moch. Ik heb toen ein paar waeke hard geoefend en kreeg toen met ein paar andere leeje partieë van Me- Dunk. Toen ik had meigedaon as zwarte piet en ein paar waeke good hat geträöt hadde ze mich al vuuël partieë gegaeve. En zoeë bin ik derbeej gekómme. Ik speul noow bijna anderhalf jaor beej Me Dunk en ik vind ‘t nog altièd hartstikke leuk, want anders waas ik waal weg gegaon. Der zien jaomer genòg ein paar leeje weg gegaon maar we hebbe d’r weer (mièr) nieje leeje beej gekrege en die zien ouk leuk net as de aldere leeje.Ik dink det dit waal genòg waas, as ik wat vergaete bin kan ik d’r ouk niks aan doon.
Hoi,
Ik heit Ferry Nelissen en bin 12 jaor. Ik maak vanaaf mien 6e laevesjaor meziek. Ik speul beej Me Dunk op de trómpet. Det doon ik beej Me Dunk vanaaf mien 8e jaor. Vanaaf april 1999 bin ik offisjeel lid van de kepèl. Ik bin derbeej gekómme via mien vader dae der al beej “zoot”.Beej de Klaroen speul ik op einen bügel en ik heb same met inkele kinder van leeje van Me Dunk en ein paar vrinde ein nieje kepèl opgerich die het:“iets groeëter as de tröät”
Hallo, ik heit Jeu Verheijden
Ik
bin ‘t einigste lid det is euvergebleve van ‘t prille begin van ós kepèlke.
Weej zien begònne vanoèt de V.M.B. van Blièrick. Ós ièrste rippetities ware op
eine zölder, daonao zien weej nao eine champignonkelder in d’n Bookend verhoès.
Toen nao ein magazien van eine melkboer, later nao ein alt kloèster in Velde en
toen weer truuk nao Blièrick nao ‘t Muspelheim. Nao
ein paar jaor zien weej verhoès nao kefee D’n Proathook en as letste hebbe weej
ós genesteld beej kefee APOLLO. In
dees 20 jaor heb ik mièr as fieftig minse zeen gaon en kòmme.
Miene
naam is John Nelissen.
Ik bin lid vanaaf 1
augustus 1994 en speulde tot november 1996 op de trómpet. Weej hadde toen zeve
trómpettiste en d’r waas ein tekort aan zwaor koper, daorum bin ik op de schuùf
gaon blaoze. Met hölp van Bep (ex-schuùfster), Wiel (ex-dirigent) en ‘t book “A
tune a day” bin ik noow d’n beste (en
d’n einigste) schuùftrombonist van de ganse kepèl. Boète ‘t blaoze bin ik
ouk sikkertaris en zörg ik veur de nuuëdige optraejes in binne- en boèteland.
Ik gaon altièd same met miene zoon Ferry nao de
rippetities
en de optraejes. Ferry zörg d’r altièd veur det ik weer alik thoèskóm.
Ik bin Ger van Haeff.
Van meziek genete det heb ik mien ganse laeve al
gedaon. In miene tienertièd speulde ik mei in eine jóngeregroep,
ik speulde op eine móndharmonika en op de banjo. Noow woort ongeveer 13 a 14
jaor geleeje gevraog door de buurtbewoèners um mei ein joekskepèl op te richte.
Beej “bäök neet” lièrde ik op de tròmpet speule, wat op aldere laeftièd neet
mekkelik mièr is en wat vuuël tièd en meujte kos Toen deze groep oèt mekaar
veel vònd ik toch jammer um d’r mei te stoppe. Zoeë bin ik in 1989, same met
Sjaak Velmans, beej Me Dunk gekómme. Haopelik meuge weej nog vuuël jaore same “neutjes”
krake.
Ik bin Joke van der Sterren
Ik bin ein
verpleegkundige die eine man, twieë minnaars (zeuns) en ein alt-sax haet. In
mien vruùgere jaore heb ik op ein mandolien en
eine piano gespeuld. Dao kin ik ‘t noeëte laeze van. Veurdet ik beej Me
Dunk kwaam heb ik ruum dreej jaor beej Zutjes Aan geblaoze. Toen ze met
vastelaovend vrooge um beej Me Dunk te kómme heb ik jao gezag. Umdet ik
gaer solo-blaos, spits ik mich op dinsdaagaovend zoeëdet ik weer nao de
rippetitie kin gaon. Ik haop det dees gezelligheid nog lang zoeë blief.
Hallo,
ik heit Hans van de Riet
Toen
ik ach jaor waas bin ik beej de Blièrickse Herte gegaon. Dao heb
ik ièrs getrómp en later bin ik aan ‘t blaoze gegaon. Ièrs op de bastrómpet.
Weej hadde toen ós eige joekskepèl,de“Knungelaers”.
Daonao bin ik beej de
Blièrickse hermenie gegaon en lièrde ik op de mezièkschoeël baeter noeëte
laeze. Beej de hermenie heb ik eine korten tièd op de cor geblaoze, maar bin
toen flot euvergegaon op ein bariton. In daen tièd waas ik oukbeej de
Echtenraayer Muzikanten wao ik ruum 12 jaor de tubapartie heb geblaoze. Toen de
kinder kwame hadde weej dao ós hand aan
vol en heb de träöt nege jaor aan de wilge gehange. Met vastelaovend ginge weej
dökker nao Apollo en zoeë bin ik, met ein bietje hölp van Carla, John en Bep,
beej Me Dunk tereggekòmme. In ‘t begin veel ‘t blaoze waal taege, maar
noow geit ‘t alsmaar baeter en ik vind
‘t hartstikke leuk en haop nog in lengte van jaore zoeë door te meuge gaon.
Ik zoel idderein van Me Dunk dan ouk
wille zegge: laot ós zoeë doorgaon en d’r 20 joeksige, nate, maar ouk muziekale
jaore aan vas plekke.
Ik bin Sjaak Boots,
Ik maak vanaaf mien 29e jaor meziek en bin begónne beej Fies Aomke op de ventieltrombòne, daonao speulde ik beej Forissimo d’n bariton en de bas. Dit letste instrument waas mich vuuël te zwaor. As ik aan ‘t oefene waas veel ik idderskièr veureuver en meus Bep mich weer rechop zitte. Nao Fortissimo bin ik beej de Klaroen gegaon terwiel ik ouk beej de Joeksjagers waas gegaon. Sinds ein paar jaor bin ik lid van Me Dunk en det bevelt mich good. Zoeë zuùs-te maar weer, veur mezièk kin mich idderein ‘s-nachs wakker make.
Hallo allemaol,
Laot mich ens efkes veurstelle, miene
naam is Dré van Hugten. Ik speul beej Me Dunk de bariton partieë
en raar maar waor det doon ik ouk nog ens op ein echte bariton. Ik bin pas op
latere laeftièd mezièk gaon make. As ièrste heb ik unne greep gedaon nao de
trómpet die ik veur einen habbekrats op de kop had
getik.
Naodet ik heej eine gas maond op gejoekeld had en ein paar noeëte kós blaoze
vónd ik ‘t tièd veur ein echte trómpet. Ik nao de mezièkwinkel wao ze die
dinger verkochte. Met ‘t water in de mónd leep ik van ‘t eine blinkende geval
nao ‘t andere, en zeej lachde mich allemaol zoeë jofel toe. Nao ein tièdje te
hebbe róndgekeke kwaam d’r eine
verkuiper op mich aaf en vroog of hae mich kós helpe. Ik vertelde um wie de
vork in de steel zoot of leever wie ‘t móndstök in De träöt pasde. Hae reikte ens hièl hoeëg en
greep zo’n prachtig blinkende träöt beej ziene nek. “Heej jóng”, zag hae,
“perbeer dees maar ens”, en ik mien bes doon det snap geej netuurlik. “Stop,
stop, stop”, reep dae verkuiper verschrik, “dich bluuës dichzelf hièlemaol van
de waereld aaf”. “Hebbe ze dich neet gelièrd deste met dienen boèk mós blaoze
en neet met diene kieëbus”. Nae, det hadde ze neet !!!! Maar
och, miene bariton bluuës lekker lich en hae blink net zoeë moeëj as die träöte
dao in dae winkel.
Hallo,
heej bin ik dan,
Miene naam is Sjaak Velmans, ik bin 49
jaor en gebaore in Venlo. Gelièk toen ik wis det ik in Venlo waas gebaore bin
ik verhoès nao Blièrick. Ik bin erg ónder d’n indrök van ‘t aantal vereiniginge
die Blièrick haet. Zoeë bin ik al inkele jaore aktief beej scouting Feron en
bin ik twintig jaor leider beej ‘t Muspelheim gewaes. In 1989 bin ik beej
Me
Dunk
gekómme en daoveur waas ik beej Bäök Neet. Dao heb ik met hièl vuuël meujte
noeëte liere laeze. Ik kan noow al ein bietje speule met heej en dao ein bietje
hölp van ein paar nummerkes. Ik bin begós met ein ventiel trombòne en speul now
sinds ein paar jaor tuba. Op dit moment waog ik ein poging um bas te gaon
blaoze. Of det lök mót ik aafwachte. Neteurlik geit ‘t beej ein kepèlke ouk um
de gezelligheid. En dao zits-te beej Me Dunk good. Ein van mien hobby’s
is ‘t organisere van fietstochte en feesaovende. Van
Me
Dunk halt
ik al jaore de partieë en andere pepeere beejein. Ik vind ‘t altièd weer jaomer
as d’r emus beej de kepèl vertrek want mezièk make mósse same doon, det geit
neet allein.Toch vind ik twintig jaor joeks en plezeer make veur ein kepèl neet
niks. Daorum is ‘t bes de meujte waerd heej met zien alle efkes beej stil te
staon, en ik zoèl zegge op nao de dertig jaor.
Melodie: Mach mier das lebe
schon
Weej zien ein joekskepèl
Speule alle met plezeer
Drinke daobeej dan ein glaeske beer
En det doon weej dan ouk nog hiel gaer
Weej zien ein joekskepèl
Speule alle met plezeer
Velt d’r daobeej dan ens eine steek
Meug gerös want weej zien maar leek
Twintig jaor ós joekskepèl zoeë gezellig en zoeë net
Maar ‘smeis is ‘t ouk
Naatje Pet. Dinsdaags rippetitie: gen gekloot
Zoeë dinke ze ouk beej Good gemoot.
We kómme oèt
Blièrick, en neet oèt Mook
Weej zien toch neet van Kappes Kook.
Kóm ens kiéke, zeg ‘t taege de bure
Sóms is ut
Neet um aan te huure.
Speule we good, dan zegge ze ouk
Ziet geej sóms beej
Hötje Lauk.
Weej blaoze d’r op los, de wenkskes roeëd
Det zuùs-te ouk beej
Hoège Noeë(d)t.
Weej rouke sigare en dreije drum
Det kump zelfs veur beej
Kepelke Half Um.
Maar weej “dames” hebbe waal ens wat te verdure in
dees bend
Sóms dink ik: waas ik maar beej
De bend zónder vent.
Toch euver ‘t algemein halde ze zich toch keduuk
Net zoeëas ze det doon beej
Haer en Truuk.
Weej gaon door, weej gaon d’r taege aan
Weej halde ‘t vol en doon ‘t
Zutjes aan.
Veur de kepèl alle ièr en roem
Det vindt ouk joekskepèl
Sjiengele Boem.
Weej blaoze
op ‘t instrument en ós jónge halde ós oèt de gäöt
Zeej neume zichzelf noow
Iets groeëter as de träöt.
Mezièk en gezelligheid, genne pop en genne punk
Det siert ós joekskepèl
Me
Dunk.
Ein leuk kedoo, ein reisje nao Benidorm
Of eine good gevölde envelop, det vinde
weej enorm.
JOKE
|