|
15 mièrt: Marcel 40
jaor en 15 jaor getrouwd met zien Chantal
Met de bus nao Velde.
Waas det neet een stökske oèt ein ald leedje?
In idder geval zoot haos de ganse kepèl op dae zaoterdaagaovend
in de bus um same met Marcel en Chantal, kinder, femilie en
vrinde in kefee “De Sport” det fees same te viere.
Beej ’t binnekómme deurde ’t zoeë as meistal ein tiedje,
veurdet woort beslaote de feesverkes ein muzikaal ‘lang zulle ze
laeve’ te bringe. Peter ‘met witte haasse aan zien hand’ steurde
ós nao ’t podium. Op mien vraog of hae ings had zien schienbaar
net gepoetste träöt met vièze vingers aan te pakke, kreeg ik as
antwaord JAO. Kump dae mich dao, gans gepaerdskeuteld, met ein
spiksplinternieje roeëje träöt aan. (kedoo van Marij veur eur
zilvere broèlof van vurrige waek).
Jaomer det ’t gezeuk met die partieë zoeë vuuël tièd in beslaag
noom. De mezièk klónk aevel good (ik merkde det beej de
bezetting, zeker de gas-speulers met ’t zwaor koper) en me kós
zeen det de feesverkes met vuuël plezeer luusterde nao de
stökskes die gespeuld woorte. Intelik kóste we gaon fillicitere.
De aolieneutjes ginge d’r in as kook, want de laege schaelkes
woorte stiekem idders kièr van taofel verruuld veur de volle.
Al flot kwaam Peter ós weer nao ’t podium haole en woort
behuùrlik mezièk gemak.
Det hebbe we wies 11 oor volgehalde en ‘t verwónderde ós det we
muzikaal zoeë good oèt de verf kwame.
De femilie had as verrassing veur Marcel en Chantal ouk ein leed
in mekaar geflans, met dao in waat leuke anekdotes oèt eur laeve
en door allemaol same woort ’t refrein oèt volle bors mei
gezónge.
En, nae neet te gluive, dao kump Nicole met ein groeëte täöt
friet met van dae vieze, vette majjenais de zaal in. Waas ’t
bang hónger te lieje? Jeroen en Sandra hadde dao ouk waal zin in
en volgde zien veurbeeld.
Marcel makde flot ein ind aan det raodsel: boète stónd eine
vetbak veur de deur en idderein kós buffele zoeë vuuël hae maar
woel. Dus gen werm en kald buffet maar einen echte frietkraom.
Det lete weej ós gen twieë zegge en ’t smakde nao mièr. De
vleisloze bamischiève ware um dien vingers beej aaf te lekke.
Truus en Jopie stapde ’t podium op in aerbaeze-kleier, dus as
Flipje van de Betuwe Tiel.
Brian had op Jopie zien gemood gewerk want hae woel zoeë gaer
waat veurgedrage hebbe. En hae wis det zien elders det super
zoele vinde. Hae had al ein paar kièr meigemak wie die twieë
‘alde doeëze’ zoeë gek wie ein raad met de fietsdaag en Caecilia,
waat op de planke brachte.
Jaomer waas det me ’t geluùd van de móndharmonia in de zaal
bijna kós huùre, want d’r waas maar ein löliezer.
De klómpendans waas ’t gans. Dae ganze koedeljak blage achter
die twieë. En maar mei stampe.
Um 11 oor ging ’t op d’n Amsterdamse toer. Eine goje zenger
brach ós met zien smartlappe allemaol in “hogere sferen”. En
Brian zörgde d’r veur det de letste hepkes op alle taofels
kwame te staon.
We woorte ónthaold met ein optraeje van ein hóndervieftig jäörig
sexy dreejtal die met ‘ne rollator opkwame. Ze wiste metein al
de ganse zaal, met de hendjes in de lóch, te ammezere.
Rónd hald twelf woel ik nao hoès gaon umdet ik nog ‘nen drökken
daag in ’t veuroètzich had. Maar Ellie wis mich te euvertuuge
nog efkes te bliève.
Vièf veur twelf reep Peter ós veur ein letste stökske mezièk nao
’t podium.
Ik begós met de res mei te speule maar merkde al gauw det die
mich met ein “lang zal hae laeve”ein serenaadje brachte.
Wie idderein mich had gefilliciteerd met miene verjäördaag,
speulde we nog twieë nummerkes die jaomer genóg neet zoeë good
oèt de verf kwame.. Maar waat kin ’t bómme, we hadde óndertösse
ouk genóg jajem in ós lièf.
We bedankde de
feesverkes veur dae geweldigen aovend en reje met Jopie truuk
nao Venlo wao we um veur de deur hebbe aafgezatte en daonao same
nao Blièrik.
Me Dunk haet zich zièr
zeker van zienen goje kant laote zeen en huùre.
Ton |
